No sias iscianu

O Sardu, si ses sardu e si ses bonu,

semper sa limba tua apas presente:

no sias che isciau ubbidiente

faeddende sa limba e' su padronu.

Sa nassione chi perdet su donu

de sa limba iscumparit lentamente

massimu si che l' 'essit dae mente

in iscritura che in arrejonu.

Sa limba 'e babbos e de jajos nostros

no l' usades pius nemmancu in domo

pruite pòbera e ruza la creides.

Si a s' iscola no che la jughides

pro la difunder menzus, dae como

sezis dissardizende a fizos bostros.

Remundu Piras